2014年6月14日星期六

荷蘭好波



1988年歐洲國家杯,我首次認識以「全能足球」聞名既荷蘭隊細佬仔時期最易被「全能」兩個字吸引,加上武俠元素 ─ 荷蘭三劍俠(雲巴士頓、列卡特、古烈治),再加上悲劇英雄既特質 ─ 兩次世界杯亞軍,你話男仔點會唔迷上荷蘭呀。到長大後,先至真真正正研究荷蘭隊,唔再一味偶像崇拜。

全能足球,英文叫 Total Football,中文重有另一名稱叫「十上十落」。呢種踢法,要求每位足球員可以勝任每個位置,簡單講句,即前鋒可以打後衛,後衛又可以打中場,所以要將兩個中文譯名加埋,先至表達到 Total Football 既意思。全能足球球員既方法,著重技術及意識,體能次之,亦唔會急於將球員限定打咩位置。要到球員成長後,再按佢既特長去決定打咩位,再加強佢既專長。所以不時聽到荷蘭球員既履歷表,前鋒踢過翼鋒,中場曾踢後衛起家呢種訓練方法令到球員基本功紮實,就算打後衛都識得射吓波,而前鋒都有意識去mark人。

呢種訓練方法係模仿工匠而來,一開始好似工匠學徒咁,學習整套相關技術,學滿師後,原理上可以一人之力製作一件工藝品,到出來工作時再找適自己既範疇。即係一個木工學滿師後,可去選擇做傢俱、起屋、裝修、維修等等,而球員就去選擇做前鋒、後衛、中場等等。歐洲既傳統訓練方法,學徒時期較短,當教練觀察到球員既特質,就即刻去做專門訓練,每人係特定位置做自己既專長,前鋒就留係前面,後衛守後,間中去助攻,中場為前鋒製造機會等等,呢種訓練方式彷如工業革命既流水生產全能足球帶來既革命,在於20世紀尾,係足球場上,發生一場工匠對工廠工人既對決!!!補充一點,南美球員技術好,又無分前鋒後衛咁濟,不過同全能足球係兩回事,以職業來分,佢哋似藝術家!

好多人對全能足球重有一個誤解,以為球員經常亂走位去搞亂敵人既部署。其實一開始部署同其他打法差別不大,球員都有特定位置,直到攻唔到,某些球員就會走離原本位置,令敵人走錯位,騰出空間,利於進攻。當然球員唔會向敵人明顯示意「我要走啦!」,通常一邊搓波一邊走出自己區域,係不知不覺中使開對手。所以球員要清楚隊友的意圖,而且去轉換位置時,又要做到相似功能,唔好單刀變解圍!全能足球訓練一個全面既球員,就係為咗咁,而背後理念係「隊員不斷尋找空間去進攻」!

四年前世界杯當時領隊雲馬維克為咗贏世界杯,竟然踢死守足球,完全忘記「全能足球」,可謂欺師滅祖!!!我身為一個死忠既荷蘭躉,由第一場開始咀咒荷蘭,望佢快出局,費事獻世。此事導致我對今屆世界杯異常冷淡,好怕見到荷蘭又死守,直到睇完今朝場比賽,先至放下心頭大石。今場都係比西班牙撳住來打,但係見到荷蘭球員不斷努力尋找空間去進攻。一切終於回復正軌。當然唔會因為一場大勝就打飛機,我重記得2008年歐洲國杯既事!






2 則留言:

  1. 以前的全能足球真係值得懷緬,宜家的足球已經唔再鐘意全能講求機械化啦。因為教練的常用戰術有D似全能足球,荷蘭今次世界杯打成點,其實對於全能足球能否再度用係大場面上都有參考作用咖。

    回覆刪除
    回覆
    1. to: 門外漢
      而家啲全能足球無以前咁多變化,陣式比較穩陣。我諗荷蘭今屆應該唔會打翻當年既全能足球。

      刪除