2012年9月2日星期日

感謝學民思潮


最近見到一班大人吵吵鬧鬧,言行似足小學雞,反而學生哥舉手投足似翻個成人,真係趣怪。學民思潮為香港學童所做嘅事,有目共睹,相信大家都好感動。最令人深刻嘅,就係佢哋面對各種困難時,都表現出智勇兼備嘅一面,好似黃之鋒拒絕同梁振英握手一事就知到。

握手係隱藏一種示好嘅意思,同談判對手未傾掂就握手,係非常愚蠢。最近岑建勳自爆幾十年前嘅蠢事,你可以話未聽過,但係幾個月前「拉布」一事,民主黨張文光同「剪布主席」曾鈺成暗中握手,而搞出一鑊泡,大家唔會唔知啩?

冷待談判對手,又唔想顯得自己無修養,黃之鋒鞠躬係一個方法,亦適合佢嘅年紀。不過我都係厭隆盛得滯,遇到咁嘅環境,我呢啲老鬼,通常用作揖,即係新年講恭喜發財時做嘅手勢,如果再賤一啲,好似古裝片啲情節,一邊作揖一邊講「唔送啦,有請!」。

學民思潮勸籲香港各界拋開成見,同心協力反抗國民教育,我舉腳支持!所以我以曼迷嘅身份,借用利迷嘅名句,「學民思潮,you never walk alone!」。


註:岑建勳的自白


註:中學生黃之鋒大戰偽術大師梁書記,過程驚心動魄,最後黃同學擊退抽水書記,為大家上了一堂公民教育。


註:送俾學民思潮




罷課笑話
聽講,香港只發生過兩次罷課,不幸地,我有份參與八九六四嗰次,當中細節都模糊,而搞咗啲笑料出來,就記到而今。話說當年我重係一名小學雞,懵吓懵吓過一日。六四屠城之後嘅某一日,老師突然同我哋講為咗表示憤慨,明日罷課,我哋一班小學雞聽到,即刻振臂高呼,高呼「好嘢唔使翻學!」。哈哈!幾乎當場激死老師。不過老師仍然耐心解釋咩叫罷課,係照樣翻學,但係唔教書,而我哋諗嗰啲係請假。所以我好出奇,今次反國民教育講罷課時,啲家長擔心無人照顧仔女,唔通當年並非全港大罷課?

到罷課當日,係學校門口見到一張白布橫額,由天台拉到落一樓平台,用黑字寫上「沉痛哀悼」,我哋一班小學雞即刻靜咗,氣氛唔同哂。上到課室,老師簡單聽解六四屠城,然後默哀,一班學生保持安靜,直到放學。

學生罷課,無人想發生,但係要嚟嘅事,就唔好怕面對,因為呢啲係公民教育,對仔女都有好嘅影響,將來大嗰會記得。所以政府最後都唔肯撤銷國民教育,中小大學就一齊搞罷課,那怕係罷課一日,或者一堂,甚至十分鐘,當為仔女先打預防針,無咁易被洗腦。

2 則留言:

  1. 無限支持這班年青人,
    共產黨不單毒害我們,還想荼毒下一代.
    請看清楚當權者醜惡面容,
    或許大家可小看一兩天電影,去支持一下絕食的朋友.

    回覆刪除
    回覆
    1. to:wai180
      各人可用自己的方式去支持學民思潮,抽不出時間去政府總部,也可以花幾分鐘,為背包或手袋綁上黑帶,以示支持。

      刪除