2012年7月1日星期日

香港被禪讓十五年之鉅獻【小小小警察】


導演:曾志偉
編劇:司徒卓漢
監製:曾志偉
出品公司:兒童城製作有限公司
公映日期:1989年9月21日
票房紀錄:HK$ 5,710,742
演員:曾志偉(飾李志堅)、張曼玉、陳百祥、李麗珍、譚詠麟、劉德華、岑建勳、吳君如、王晶、陳友、鄭丹瑞、恬妞、苗僑偉(飾千面人)、曹敬文、蘇靜雯、葉偉信、吳石、敖志君、劉偉強、鄺庭和、黃志明、鄭則仕、陳欣健、陳奕詩、莫少聰、成奎安、董驃、樓南光、張敏、張學友、瑪莉亞、戚美珍、徐少強、吳耀漢、曹查理、馮克安、爾冬陞、柯受良、張堅庭、陳勳奇、楚原、關明玉、馮淬帆、文雋、廖偉雄、盧堅、午馬

日字再加一筆劃,你最先想到什麼字?從中選一個,田、目、由、甲、申、旦、白、巴。據說這個心理測驗可知你是什麼樣的人。我也有個非常準確的測試,如看過《小小小警察》,覺得無聊,便是嚴肅人;覺得可以一笑,是平常人;覺得好很正,是戇居人。戇居人是指那人喜歡戇居,不是說那人戇居。

主角曾志偉自小想當警察,但生於一個賊家庭,人生茅盾由此起,做警察,家人反對,做賊,學校又不讚成。在兩難之下,曾志偉一生人總活在戇居之中,所遇到的人和事都是戇居的。所謂戇居,文雅說法是荒謬。而在日常生活中有不少事情都很荒謬,不過久而久之,習慣成自然,逐漸變得合情合理。一個人失戀時,到海旁高喊舊情人的名字,那種孤單無奈本來十分有型,但在戲裏曾志偉做此事時,突然有幾個人即場跟著做,那場面即時變得滑稽。本片就將合情合理的荒謬放大,戲謔一番,看了便察覺當中戇居之處。

戲裏午馬教曾志偉飲豉油,而你覺得怪誕,認為這樣事情無可能發生。但我就試過食油雞飯時,問侍應拿碟薑蓉來伴食(非常普遍之事),誰知侍應用了十五分鐘解釋,食油雞只食那雞肉和豉油混合而成之味道,加了薑蓉會破壞油雞的原味。為什麼講了十五分鐘?因為侍應照樣給我薑蓉,不過在我吃的時候解釋,而我食了十五分鐘之久,差點一邊吃一邊流淚!不要笑說本片虛無狂想,只是你一生幸運,未遇過怪事,戲中的餐廳笑話,我都遇過,看了感到親切,好笑,亦喜遇知音。

年紀越來越大,自己和朋友都不自覺變得非常理性,甚至以理性去將荒謬事情合理化。剛剛重看「兒童城」出品的《小小小警察》,依舊覺得好很正,猛然發現自己仍是一個戇居人,值得慶幸!為保懂得分別什麼是合理的荒謬,決定每年今日重看《小小小警察》,同時查核自己是否來自兒童城的戇居人!



本片可說是套口水戲,很多對白,很多哲理,很多詩詞。現在折錄一些精彩的,加上本人註評,簡單著作成「小小小警察之文集註評」:

因為人生就係由一連串嘅不幸所組成,而最不幸嘅,就係當你幾許風雨之後,每一個不幸竟然都會化為祝福。
波叔註評:「柳暗花明又一村」七個字就可說明以上對白,本片就用上四十個字,化簡為繁,呢啲就叫做哲學。

正因為我唔點樣做嘢,我就做到嘢!
波叔註評:原理同《大內密探零零發》中周星馳所說的一樣,「有啲嘢,你唔搵佢,佢就自自然會出現。」。反轉來說,你有破壞無建設,或阻住別人做事,影響事情進度。

男:我愛妳係因為……
女:係因為咩呀?
男:唔知!就係因為唔知,所以我好愛妳。

波叔註評:知道原因,就不會愛你啦!

女:B仔你變咗
男:妳都變咗
女:我變係因為呢嗰世界變咗
男:我變亦都係因為呢嗰世界變
女:你搞錯啦,我係話你對眼變符好淫呀
男:係!因為我啱啱為妳喊完,所以咁
女:何必呢!

波叔註評:有幾多人可以世界變,而自己不變?相信只有傻瓜不變。

昨夜此時此房中
翻雲覆雨好輕鬆
輕鬆對象何處去
老雞盡在發噏瘋

波叔註評:這首七言絕詩幽默說出棍男之苦,作者可說是柳永再生,究竟是誰呢?

男:二十年,真係滄海桑田,記得當時年紀小,你愛談天,我愛笑。
女:有一會,你我並肩坐在桃樹下,不知不覺睡著了。
男女:夢裏花落知多少

波叔註評:新詩的水準也不差,夠無聊!




註:記得小時候,某個小鄰居借本片的錄影帶給我看(不是從錄影店租的,是私製的VHS),看了當然覺得驚為天人,後來此帶不斷流傳開去(事後明白這種朋友分享手法,建立了一個良好的人際網絡,對於日後分享鹹帶有莫大幫助。)。當時左鄰右里的小童都看過,大家對談時便不斷重複戲中對白,當一個人講了「死仔包」這三個字,你要即將接著唱「死仔包死仔包死咗個頭」,否則會被人鄙視。既然本片因版權問題而近乎絕版(詳情請看太郎suling的介紹),本人就發揮當年的分享精神,又借別人的來轉載全片。看畢,希望他朝你也成為兒童城的戇居人。

13 則留言:

  1. 最記得係張國強去報警 話唔見左自己 曾志偉叫佢去做立法會議員黎搵返自己

    回覆刪除
    回覆
    1. to:nic
      最記得死仔包嗰段,始終係童年回憶!

      刪除
  2. 記得有一幕是曾志偉咪咪頭掉了又黏回去、掉了又黏回去XD

    回覆刪除
    回覆
    1. to:BIGBOSS
      這一幕,最奇怪是爾冬陞跟曾志偉一齊搞笑,哈哈!

      刪除
    2. 不奇怪 - 另一奇片《貓頭鷹》正是爾冬陞編劇也。

      刪除
    3. to:琛
      爾冬陞也演過一些喜劇,不過在本片中那麼低俗及賤格,就很少見。

      刪除
  3. 未睇過既? 俾你講到好有興趣想睇! 多謝介紹!!!

    回覆刪除
    回覆
    1. to:Greenswalker
      睇完,覺得好正的話,你就自動成為兒童城的公民,哈哈!

      刪除
  4. 譚詠麟那句我唔係院長,我係上帝!多謝你給我們的集體回憶!

    回覆刪除
    回覆
    1. to:Damselfly
      那句應該要改啦!我唔係院長,我係校長!

      得閒多啲來!

      刪除
  5. 呢套戲上既時間我係小學六年班~~個陣係華富閣睇~~無DVD無VCD搵到…呢幾年網絡成套成套電影放上網…可以有幸睇番…睇完發現自己都成為成人…別有風味…

    細個幾得白粉西裝~~重有肥爺唱歌既一段…一大班明星!真係有今生無來世!你要咁搵一班當時得令既明星黎同你做咖喱啡有情客串?好難啦!

    除非…你係千面人啦!

    回覆刪除
    回覆
    1. 係肥媽~同埋個段歌舞真係正~~

      刪除
    2. to:Gallen
      好開心有當年嘅小學雞來回應,哈哈!我相信就算今日嘅小學雞睇呢套戲都會有好大衝擊,都會學肥媽唱歌!因為死仔包呢三個字實在太正啦!

      刪除