2010年5月20日星期四

【龍的心】洪金寶導演



導演:洪金寶
編劇:黃炳耀
演員:成龍、洪金寶、朱寶意、黃錦燊、鍾發、狄威、孟海、高飛、太保、田俊、陳龍、午馬、陳友、林正英、胡楓、元奎、元華、錢嘉樂、陳國新

《龍的心》是套特別戲種,屬動作文藝片,慘情催淚,正宗打到你喊。世事又豈如盡人意,拍出來似動作喜劇,多過似文藝片。在黃炳耀編寫眾多作品中,本片不太出色,劇情稍為鬆散簡單,人物性格過於「卡通式」,即太誇張,是不「稱職」的文藝片。換個角度看,本片是套好睇的動作喜劇,而且影響甚大,看看《精裝追女仔》怎麼惡搞,及使人憶起香港奇人中環洪金寶。慘情文藝片從來抗拒喜劇明星,而非動作明星。當洪金寶剪了湯碗式髮型,本片在觀眾心目中便註定成為動作喜劇。由髮型、服飾、行為舉止來看,洪金寶有如巨人的兒童,極卡通化;劇情講洪金寶食霸王餐困於雪房、見工被午馬玩、讀書被老師笑,對白慘過粵語長片,白臉譜去得太盡了。兩者的表達手法皆是過於其份,極端過份,營造出惹笑效果,覺得製作人是有心玩喜劇,或者甩不掉強烈的喜感。笑中有淚的電影是很難拍的,本片保住搞笑,已算不錯,哈哈!

由於洪金寶弱智,少動作場面,只有捱打,無得還手,惟有一場太保踢他落山坡,頗為危險,不過畫面幾震撼。其他人則繼續打到飛起,有幕經典之作,八個人橫排成一字型後,一齊跳樓,有四、五層樓之高,何其壯觀,非常危險,真是用命搏的,必看之名場面。成龍未有參與此幕,仍很落力打了多場,其中有幾幕令小弟留下深刻印象,甚少出現於成龍電影,可能只此一套,就是成龍不時與朱寶意「打茄輪」(有傳由香港足球俗語轉化而成,茄輪為cannon之音譯,球員相撞之形容借用為男女接吻。),相當肉緊,成龍陶醉之貌在小弟腦海中揮之不去,初見淫龍之像,造成陰影,連帶影響戲中兄弟情之觀感。

講翻戲肉,成龍照顧弱智洪金寶,兄弟情有點造作,不太感動。反而本片保留了洪家班的電影常見師兄師弟之情誼,更觸動人心。片中成龍在特警隊工作,帶領士多啤梨小組 (又一明顯玩喜劇之證據),結識一班好友,有孟海、元華、錢嘉樂、元奎等等,眾人時常照顧洪金寶。及後成龍要去劫警方人質去救洪金寶,又即時叫班兄弟幫手。雖然眾人怕犯法,不過聽到成龍一句「點解咁多人唔叫,淨係叫你哋,因為我哋係friend,先叫你哋幫手!」,義字當頭,眾人甘心拼死一搏,正!結果救出洪金寶,不過眾人坐監收場。影片最後幾分鐘很有意思,成龍等人過着牢獄生活,互相鼓勵,之後班兄弟陸續出獄,又繼續照顧洪金寶,等到最後,成龍出獄與洪金寶重逢,成段戲無對白,只播着經典金曲《誰可相依》,已經感到溫情,不只有成龍與洪金寶之間的親兄弟情,還突出了成龍與警隊手足之兄弟情。又間接交代成龍為主犯,所以最後才出獄,比口述或字幕道出劇情,更深入人心。



註:戲中洪金寶所著的童裝,正中鬼佬碼。


註:香港奇人中環洪金寶


註:八「件」一齊跳樓


註:主題曲《誰可相依》
作曲:林敏怡
作詞:潘源良
主唱:蘇芮

童年時話過 一生到盡頭
也願意拖著你的手
從來無後悔 不管笑或愁
也沒有考慮分開走

求能明白我 光陰再逝流
我共你思念總不休
人隨潮浪去 不可以逗留
這份愛一樣不肯走

情從幼開始滲透 已令我忘掉了自由
偏偏沒法一起奮鬥 不通的心怎補救 相依可會永久

濃情仍似海風永不休 再會時矛盾的苦楚偏要受
試問誰人能夠相依過一生 即使將前途統統犧牲也肯

昂然前去不必再傷心 遠或近原來亦不必追問
衹要濃情同我相依過一生 孤單中仍然可找到你心 跟我極近

16 則留言:

  1. 波叔,演成龍女友的不是簡慧真,是台灣寶島美女朱寶意,即《英雄本色》系列張國榮的女友jackie同《胭脂扣》做萬子哥女友楚楚那位!

    《龍的心》反而是我幾喜歡的作品,洪金寶、成龍兩大哥少有地以演技代替武打,雖然不是完全成功,尤其成龍大哥太過誇張,但都不失為當年的嶄新嘗試。

    回覆刪除
  2. 《龍的心》又係細個入戲院睇的戲, 當年唔識嘢同大部份香港市民一樣吹捧成龍, 但後期再睇番先覺洪金寶真係好戲, 係一個全能演員, 文戲武戲都好得. 成龍的文戲永遠得一個樣, 反而洪金寶演技多變化. 就算最近睇《葉問2》, 洪爺真係壓得到場, 演得好過甄子丹.

    回覆刪除
  3. to:William仔
    哈哈!我一直以簡慧真和朱寶意係同一人,多謝更正!其實套片好睇的,但不要當文藝片咁睇,始終覺得他們有心搞笑。以事論事,洪金寶同成龍有演技的,當然唔係去到影帝級,不過有啲角色兩人演得好好。

    to:30-sth-guy
    其實當年唔止香港,台灣都勁讚成龍,可能見佢有心轉型。如果將洪金寶同成龍比又唔同級數,洪金寶正好多。不過洪金寶在九十年代中後,都有轉型問題,直到近年在《殺破狼》同《葉問2》中,專演一些霸氣十足的角色,好似令洪金寶找到新方向,令人再對他有期望。

    回覆刪除
  4. 波叔,我最愛的洪金寶大哥真的是兩屆影帝啊,曾憑《提防小手》及《七小福》拿了兩屆香港電影金像獎影帝,成龍亦曾在台灣金馬獎憑《超級警察》及《重案組》拿過影帝。但兩位我還是獨愛洪金寶大哥!!

    回覆刪除
  5. to:William仔
    我知洪金寶同成龍攞過影帝,呢樣我知架,哈哈!洪金寶憑《提防小手》攞咗半個影帝,另一半係麥加《最佳拍檔》,當年搞到我一頭霧水,兩人係做得好,不過係唔係勁到攞影帝,心中有個問號,再睇惠英紅憑《長輩》攞影后,覺得當初金像獎都有啲古怪。《七小福》洪金寶做得好好,不過贏張國榮的十二少,又有點....,所以我心目中洪金寶只是接近影帝。
    成龍攞台灣金馬獎,我直情唔服,情況有如黎明和郭富城攞影帝,你唔好要我叫此三人做影帝。金馬獎的水準有時起伏太大,要每年睇,有時好離譜,我之前已經寫過吓金馬獎的問題,現在寫緊金像獎,遲吓就出。
    以上論點有啲偏激,極主觀,有啲對以上影帝不公,無視客觀事實,不過暫時心中難以改變此睇法,哈哈!

    淺談金馬獎
    http://oldhkmovie.blogspot.com/2010/04/blog-post_3765.html

    回覆刪除
  6. 波叔, 如果你講四大天王, 我覺得最好戲的張學友反而未攞過影帝最不值. 黎明最唔掂, 劉華無甚變化而演技外露, 郭富城直情誇張添啦. 張學友比較穏定, 不慍不火, 可能係蝕底在角色唔夠出.

    香港電影金像獎呢, 惠英紅憑《長輩》攞影后, 我未睇過所以唔知點評論. 但第二屆有提名之下, 林碧琪憑《靚妹仔》以零演技都贏到, 仲要係贏張艾嘉繆騫人等, 簡直係離哂譜.

    回覆刪除
  7. to:30-sth-guy
    張學友在最紅時拍了很多普通商業片,而近年又好少接到好電影,難以判決。四人中,反而覺得劉華最好,始終拍了不少高質電影,當然我唔覺得劉華好好戲。另,當年張艾嘉好似以《最佳拍檔》提名,係好戲,有突破,不過喜劇好難出影后。林碧琪未必有演技,不過佢食到在《靚妹仔》個角色。

    回覆刪除
  8. 上面班傻閪講埋啲廢話,九唔搭八,不知所謂

    回覆刪除
  9. 無端端講四大天王把呀,你班傻閪九唔搭八,不知所謂

    回覆刪除
  10. 劉德華食屎,佢就嚟死

    回覆刪除
  11. 呢套龍的心我都幾鐘意,不過波叔,戲中成龍班兄弟其中一個好似唔係元奎,不過果個人我都唔識係邊個
    講到第一年香港金像獎點解洪金寶同麥嘉會一齊攞影帝,我覺得係因為果時無咁多人才,而且佢地兩個拍咁耐戲,點都要俾下面,俾個獎表揚下都要
    我唔敢講四大天王邊個好唔好戲,黎明係好似做戲好唔掂,但如果佢放低形像,佢應該做到好多好戲,三更係一例;張學友做旺角卡門係一絶,無得彈,劉德華起碼有劉建明係代表,郭富城都叫有寒戰,什至早期都有浪漫風暴都唔錯,我唔敢講四大邊個好邊個唔好
    fm無敵

    回覆刪除
    回覆
    1. to: 無敵
      係我寫錯咗,如果你講嗰位係肥肥地既兄弟,應該叫孟海。

      查翻啲資料,第一屆最佳男主角係許冠文,洪金寶同麥嘉係第二屆,同屆候選人有陳惠敏 (殺入愛情街)、.林子祥 (投奔怒海) 、張國榮 (烈火青春),又真係幾難揀,哈哈!個結果都似受到兩人既江湖地位所影響。

      四大天王始終好難擺脫偶像的框架,我覺佢地唔係太識演戲,除非撞正一啲啱佢地演既戲先至有表現。其實邊個好邊個唔好係好個人既事,鍾意咪講囉,唔使咁大顧忌既,叔叔俾膽你!

      刪除
  12. 如果講返洪金寶同麥嘉一齊攞影帝 我就覺得當年寶爺套提防小手 佢係入面唔算有D咩傑出表現 相比起光頭佬 寶爺算係不過不失而已 (個人感覺)

    回覆刪除
    回覆
    1. to:nic
      其實係候選人中,林子祥 (投奔怒海) 最似樣,不過要我揀,我揀秦祥林 (殺出西營盤)。

      刪除