2010年4月4日星期日

【精裝追女仔之二】王晶作品

導演及編劇:王晶
演員:劉德華(飾劉備)、曾志偉(飾吳準少)、劉嘉玲(飾芳芳)、陳百祥(飾交通燈)、李美鳳(飾程寶珠)、黃韻詩(飾十三妹/妹姐)、顏寧(飾家燕)、王晶(飾西門慶)、盧海鵬(飾老周)、許英秀(飾亞sir)、馮淬帆(飾劉定堅)

近年,無綫電視總經埋陳志雲出鏡頻頻,不同形式的節目亮相,非常活躍,即刻聯想到「老周電視台」,有睇本片都知是什麼一回事,兩者不同之處在於老周為慳錢經常親自上陣,至於陳先生為咩,小弟諗唔到。《精裝追女仔》大收,拍續集係必然之事,王晶將堅記車房上下帶入電視台,繼續追女仔,不過無預發哥,換上劉德華,靚女陣則比上集豐富,各適其適。

大橋係一個鋤強扶弱的故仔。以黃韻詩同馮淬帆為首的兩幫人,皆準備投身電視圈的明星仔。開頭兩伙人經常鬥氣,不過發達台棄用他們,輾轉投身弱台老周電視,最終眾人齊心協力,成功打低發達台。烏合之眾戰勝強大的惡勢力,以此大橋作故事棟樑,加插不同笑話,劇情不會散亂,如此簡單的「工序」,很多香港喜劇都忽略,成日以為喜劇不需大橋,笑話出色就可。以笑遮醜,理論是可行,撫心自問,世上又有幾多創新笑話,可以遮掩大橋之不足。本片以八十年代的電視界作背景,老周電視台明喻丘德根主政的亞洲電視,發達台則是無綫電視,王晶於電視台出身,戲裏影射當年的趣聞,識得對號入座,必然樂在其中。王晶不只拿無綫同亞視來取笑,也預料電視界的趨勢,戲裏有個節目「唔啱就要打」,之後真是流行「鬧人節目」。成套片記錄香港八十年代的娛樂圈生態,有其歷史價值。

《精裝追女仔》第一集的愛情線,周潤發同張曼玉玩隱瞞身份,試出真愛。今回,不要誤會愛情線以劉德華李美鳳為主,無論戲份同劇情,皆著重於黃韻詩馮淬帆。王晶明顯向《秋天的童話》借鏡,玩男女文化衝突的愛情,誇張船頭尺與十三妹的性格,縮骨老套劉定堅代替自卑船頭尺,尖酸刻薄妹姐代替文雅十三妹,惡搞其經典對白。妹姐邂逅中國「城」同學會會長劉定堅,憶起初戀。眾人出錢引誘劉定堅追妹姐,兩人勉強共渡愛河,「孽戀」開始。劉定堅以為妹姐是金礦,付出「真心」,望可財色兼收,及後東窗事發,兩人分手。這段愛情起起落落,黃韻詩演繹老姑婆仍有少女情懷,可謂一絕,對馮淬帆多番忍氣吞聲,甘心受辱,兩人合演喜劇,擦出火花,真係笑死街坊。馮淬帆在上集扮弱智成功出位,今次擔大旗,表現更勝一籌,演了很多經典笑話,如陳自堅、單鶉蛋治、無上裝餐廳等等,最鍾意點笑穴一段,由廁所走到殯儀館,馮淬帆的個人表現,示範如何演喜劇。本片的喜劇情節穩紮穩打,未見特別,不過由出色的演員演繹,便成經典笑片。現時香港無笑片睇,主要原因就是缺少識演喜劇的演員,個劇本再好都無用,落入木頭演員或誇張的話劇演員中,即時喜劇變悲劇。

過往睇王晶的電影,多數著重故事情節,對畫面毫無期望,就算拍了很多三級片,毫無美感可言,本片中眾人在沙灘玩樂一幕是例外,令小弟印象難忘,身材健康的靚女配上水清沙幼的沙灘,天海一色,唔講以為去了泰國,實情是西貢沙灘。電影人只要有心找,香港有好多靚景。


註:船頭愛茶煲


註:點笑穴


註:楚肥香


舊回應:
OdaBu HuDSoN 2010-02-13 13:47
適逢剛才在衞視電影台重播又睇了一次, 都仲係咁好笑. 亦感慨及同意今日港產片的喜劇橋段, 演員等水準不及以往.
邵氏篇網誌幾長, 稍後再仔細欣賞. 祝新年快樂, 身體健康. :-)
醒波 2010-02-18 19:43
祝身體健康!
喜劇對演員要求很高,今非昔比,非祟古而已,是現時太多木頭演員。
William仔2010-02-06 15:13
永遠懷念 八九十年代的港產喜劇(1980-1996)
醒波2010-02-08 23:07
哈哈!有晒年期同悼詞,講到港產喜劇已死!
V for Vincent 2010-02-02 10:29
《精裝追女仔》系列我只是普通,首兩集還可,第三集最差。我較喜歡《最佳損友》多些,第一集真的很好笑。
其實我較喜歡王晶早期的作品,他的80年代的喜劇很多都幾好(縱使都是抄來抄去),除《最佳損友》外,我記得的其實還有一部叫《專釣大鱷》,那時真想不到原來萬梓良搞笑都很了得、很搶,但相信現在已沒有多少人記得此片了。此外,兩集《賭俠》、《整蠱專家》都幾好,但奈何之後有一輪他的片都非常劣質行貨了。
醒波2010-02-02 23:52
《最佳損友》係《精裝追女仔》的姊妹作品,都是好好笑,不過《最佳損友》再誇張啲,相信大家都記得阿叻的純潔眼淚。另《精裝追女仔》第三集,王晶只是監制,質素係差啲,不過我覺得還可以。
其實喜劇的大橋來來去去都是得幾條,而王晶由八十年代到現在都「堅持」玩卡通化的追女喜劇。我都幾鍾意《專釣大鱷》,王晶少有好睇的動作喜劇,萬梓良過度抗奮的演技,好有喜感。而《整蠱專家》是港產喜劇的戲寶,遲些會介紹。現在的王晶呃緊大陸人啲錢,短期都唔會有好嘢睇。
麥don鴻 2010-01-31 19:56
我都LIKE睇第二集多過第一集,第二集既支線劇情豐富,馮粹杋演喜劇真係好有個人風格,往後吳孟達既演繹喜劇方式,唔多唔少都有D馮氏影子。香港既喜劇女演員不嬲好少,黃韻詩既演繹係好個人化,佢既聲線同表情演繹,真係只有黃韻詩獨有........往後既吳君如只係一味單一性醜化自己黎取悅觀眾,論喜劇演繹三姑只係岩岩合格而已。
醒波2010-02-01 20:48
同意二好過一,比較喜歡第二集以弱勝強的故仔,戲劇性豐富啲。馮粹帆同黃韻詩演繹啲尖酸刻薄的角性,在喜劇中真係一絕,尤其憑口齒伶俐去講對白,唔係好多人做刑。馮粹帆厲害在演嚴肅戲,一樣掂,最近見他復出,依然有料到。香港喜劇女演員來講,黃韻詩似周星馳,吳君如似張偉健,雖然兩者都好笑,不過明顯兩個級數。串啲講句,吳君如唔係好捉到啲喜劇節奏,就好似張偉健做啲表面嘢或誇張動作,去取悅觀眾,不過喜劇女演員少,所以先至突出。現今影壇我覺得苑瓊丹比吳君如好笑好多,苑瓊丹好戲之餘,還可以同拍檔擦出火花,反之,吳君如有啲自己顧自己。
OdaBu HuDSoN 2010-01-31 12:08
好鍾意「唔啱就要打」呢個<節目>, 當中有阿叻講:「 唔去天天漁港食飯~~~ dup佢~~」, 盧海鵬: 「嘉賓與主持打成一片~~」 睇番都咁好笑. XDDDD
好同意, 今日睇番係記錄左那年的娛樂圈生態, 另外那時好喜歡黃韻詩, 佢演出的風格,聲線上的運用到今日都找不到人代替.
感嘆是, 今日的港產電影笑片, 感覺好爛, 反而追女仔系列 (一, 二集) 睇番仍然覺得好正好精采, 言之有
醒波2010-02-01 20:00
「唔啱就要打」暗串當時名人,有一段曹查理唔出聲以示不滿,阿叻同志偉就輪流唱衰佢,好好笑。
點止記錄當時娛樂圈生態,還爆秘聞,有幕譚詠麟客串,只是過鏡而已,馮粹帆等人串譚詠麟做咗股壇大閘蟹,正宗玩人唔使本。
今日的港產笑片,最大問題真係無出色的喜劇演員,當然劇本爛到不堪入目,現在連周星馳都回塘,唯有睇西片才有笑片。

沒有留言:

發佈留言