2010年4月3日星期六

【監獄風雲】林嶺東作品

導演:林嶺東
編劇:南燕
演員:周潤發、梁家輝、張耀揚、黃光亮、何家駒、成奎安

《監獄風雲》影響我一生,本人潔身自愛 (只限法律上),只怕入獄見到「大咪」。當年睇此片令我最震撼,影片將黑社會幫派鬥爭的故仔,由日常社會轉移到監獄,此背景令觀眾感到驚喜。戲裏說出許多監獄的生活細節,增加不少趣味,獄中暗語更成一時「潮語」,如皇家柴指煙仔、雀屎指煙灰、單人倉叫水飯房、通櫃係肛門檢查等等。

去除監獄的背景,本劇是個平凡樂天的小人物 (周潤發飾演) 周旋各派黑幫的故仔。如果日常生活中,小人物周潤發和梁家輝不斷受黑幫玩弄,大不了走為上策,偏偏身處監獄,更遇上其身不正的懲教員殺手雄,無路可走,之後所受的凌辱便言之成理。兩主角之外,劇中陰濕記仇殺手雄、「搞屎棍」大咪、大聲夾無準的傻標、惡人大傻,人人個性獨特,觀眾看到過癮。角色深入民心,戲中一言一語都成為經典對白。

結果又是精彩,殺手雄將周潤發和梁家輝與大咪同倉,臨走還陰笑向大咪說:「大咪,今晚唔好玩咁夜。」,之後更掉走獄卒。周梁兩人境況堪虞,猶如小狗困入獅子籠,無路可逃,可謂必死無疑,殺手雄之陰險表露無遺。打鬥場面血腥,大咪被打,不是流血,而是嘖血,如水柱般。在細小的監倉,眾人圍觀打周潤發和大咪「隻揪」,不斷穿梭上下格床,呯呯嘭嘭,十足困獸鬥之局,視覺聽覺皆感受強烈的壓迫力。

正所謂打狗入窮巷,迫使周潤發反噬,忘人性,爆發出原始獸性。周潤發將大咪的頭鎖緊在下格床,狂嘯如野獸,梁家輝也嚇一跳,痛哭苦勸無效,獄卒用水柱射才平息。用對付癲狗咬人的方法拍攝此段,正!及後殺手雄入倉再打周潤發。逼發仔終極反撲,用口咬下殺手雄的耳,失常狂笑,慢慢吐出耳仔,不得不讚林嶺東處理暴力打鬥場面。這場戲定必留意發哥的忘我眼神,盡顯獸性。平易近人的小人物被逼至發狂,觀眾看到咬牙切齒,係人都想打殺手雄。


註:條預告片幾精彩,會令人期待。

註:我覺得「大咪」同倪匡幾似,哈哈!


舊回應:
Lam Lam 2009-01-13 21:20
呢套戲真係好多經典場面同對白!到而家仲好有印象!
醒波 2009-01-13 23:02
太多出位角色,編劇應記一功。
icicle 2009-01-12 17:40
真係似得幾交關!
醒波 2009-01-12 19:47
哈哈!
惡搞王 2009-01-11 23:39
http://www.yesasia.com/us/1001836770-0-0-0-zh_TW/info.html

雖然劇情"近似",但都值得一看!
醒波 2009-01-12 19:53
謝!有夏文汐可以一看。魯芬拍很多此類片,女「大傻」,正!
麥don鴻 2009-01-11 20:57
何家駒(大咪)真係一個唔錯既性格演員,特別做奸角特別精彩,我睇過有一套戲叫"轟天龍虎會",戲中何家駒用原聲講英文同法文都非常流利,真係估佢唔到,同埋佢雖然做奸人惡人,不過佢原來係佛教徒黎仲食長齋添。
醒波2009-01-12 20:05
「大咪」係佛教徒?真係估佢唔到。佢個奸樣令人害怕,而且他飾演的角色害人定必接二連三,「手尾長」。不過好多性格演員都與螢幕中不同,專演道友的曾楚霖是其一,他幾十年前已經大學畢業,估佢唔到。
HoraceChan 2009-01-11 20:20
真係幾似倪匡喎~
梁家輝演柔弱男人都很不錯﹗
醒波 2009-01-11 20:32
梁家輝出道時拍文藝片,柔弱男人可謂一絕。
BS2 2009-01-11 16:34
呢套絕對精彩, 不過個人最喜歡嘅林嶺東電影始終係"龍虎風雲".
醒波 2009-01-11 19:25
兩套都正,不過本片影響力大啲
惡搞王 2009-01-11 11:25
條預告片show晒最好睇既劇情當年睇真係好振撼!把觀眾帶到監犯的陣線,所有獄警都是壞的!最後周潤發受欺壓發圍個幕看得很熱血!
還記得有女版監獄風雲?有o都o都姐同馮寶寶演出的。
醒波 2009-01-11 19:28
女版監獄風雲?記唔起,有冇片名?冇印象dodo姐拍過監獄片

2 則留言:

  1. 女版監獄風雲叫"女子監獄"由林德祿執導,鄭裕玲,馮寶寶,夏文汐,陳嘉玲,魯芬主演,好朋友影業出品

    回覆刪除