2010年4月3日星期六

【救世神棍】李志毅作品


導演:李志毅
編劇:李志毅、阮世生、林愛華
演員:梁朝偉(飾黃大鳳)、陳小春(飾陳春)、林保怡(飾樊智)、莫文蔚(飾Joan)

千術層出不窮,老千電影亦形形色色。本片戲名中「神棍」二字,簡單說明,老千用「神」騙財。清末民初,詐騙集團江相派在中國南部橫行,其中有騙術經典《扎飛篇》,教授門徒如何製造神蹟,借神的名義替信徒消災解難,從中騙財。不少神棍用《扎飛篇》之術,建立神廟騙取大量香油。主角梁朝偉自細跟師父吳耀漢在此類廟宇搵食,當然懂得造神之術,選中半痴半醒的陳小春扮「神」後,製造神蹟,如醫好昏迷的歌星及為港督尋回狗隻,藉此廣收信徒,發其大財。

睇過不少老千電影,多以草根人士為主,不過本片由《UFO》製作,點會甘心模仿王晶式的老千片。承繼《UFO》傳統,幾位神棍皆活在中產世界,如騙術講求市場學;錯綜複雜都市男女關係;陳小春名叫達達大師,明顯借用達達主義等等。每每睇《救世神棍》都想到《流氓醫生》,兩片格局極似,只是主角職業不同而已。中產背景成立,影片格調必然高尚,所造的「神」亦需有型,不會用觀世音菩薩或黃大仙等中國傳統神靈,而達達大師就取材西方神明耶穌作模樣,大玩一番。尾段達達大師受槍傷大難不死,服飾即換成白色長袍,手持兩塊山頂公園守則的石板「惡搞」十誡,想以自縊為世人贖罪。其中一幕拍出港產式的震撼感,達達大師的肩胛扣上木棍,由尖沙咀坐「嘩啦嘩啦」(或稱為大眼雞的小型木製機械船),站在船頭,迎風而去,準備直上山頂「出席」縊道大會,沿途眾人追隨,極富神蹟色彩。

縊道大會亦玩味十足。達達大師要求眾人講出罪行,眾人一一道出,跟着達達回應一句「我願意以我嘅死,替你哋贖罪。」,眾人立即瘋狂叫喊:「燒死佢!燒死佢!」。編導似藉此幕諷刺信徒不知廉恥,只想找到代罪羔羊,以求自己心安理得。同時另一班神棍覺得達達大師已痴線,不能控制,便藉縊道大會宣佈林保怡為繼任人,以便繼續弄神騙財,當中隱喻異端邪教慣用手法。

本片開頭由中國神棍,走到西方邪教,編導不是無神論者,只想觀眾不要過份迷信而已。片中梁朝偉不斷同「天」對談,以及「惡搞」牛郎織女作結尾,印證編導亦是有神論者,不過唔知何方神靈,哈哈!千術同宗教混為一談,港產片多以咸片或王晶式千局為主,《救世神棍》編導卻借老千題材論迷信,神棍由古老神廟走到新式宣道方法,提升格調,擺脫過往老千片的騙財騙色主題,少見,有其獨到之處。


舊回應:
baller 2009-12-15 09:53
琴晚啱啱睇完呢套舊片, 當年UFO d 戲比起而家真係好好多.
想借問聲, 知吾知尾段個, 扮哂氣勢磅薄, 好似opera 既soundtrack 係咩名 ?
醒波2009-12-15 22:14
套戲尾段,我只記得有《凶兆omen》首歌,似opera 個首我都唔知,sorry!
OdaBu HuDSoN 2009-07-23 19:38
今日睇番覺得此片條橋已經勝過不少港產片, 亦好懷念UFO獨有的中產電影風格, 當時最喜歡是風塵三俠同新難兄難弟..
醒波 2009-07-23 22:15
條大橋真係唔錯,香港現在好似很少電影人主導的公司,所以我都懷念UFO。另兩片比較喜歡《風塵三俠》,題材捉到當年男士心態,不錯!
麥don鴻 2009-07-06 06:58
呢套戲劇本大剛唔錯,不過拍出黎又真係兩回事,但UFO既中產電影風格,可以講係呢套戲吸引元素其中之一,同埋當年既莫文蔚雖然絕對唔靚,不過佢既野性又真係令人幾想"啅",以上全屬小弟個人意見...........其實李志毅個人代表作真係無乜,佢拍野太飄,只識一味KEEP住UFO時代既人靚景靚中產FEEL宗旨,但拍出黎既野就無咩靈魂,不過佢個朵係日本就唔錯...........都唔知日本仔BUY佢D乜.............
醒波2009-07-06 21:16
條大橋真係唔錯架,不過真係有唔少前後不呼應,講咗成兩粒鐘勸人不要迷信,結尾又「惡搞」牛郎織女。
我都對莫文蔚有啲研究,將莫文蔚同舒淇攞黎研究,兩人雖然絕對唔靚,但可令人想"啅",有一個原因,就係佢哋身材皆是骨肉勻稱,唔會多唔會少,視覺令人意亂情迷,以上小弟愚見,不過絕對值得參考!
李志毅,如我對v for vincent所說,太貪心,太多訊息,太多靈魂,即係無靈魂,唔捨得剪片真係導演大忌。至於日本仔BUY佢D乜?佢係訪問講過當年在日本拍《不夜城》,佢無通知有關當局直接去啲龍蛇混雜的地方拍攝,更即場表演香港導演絕技用一個鏡頭直落拍攝,當日有去睇拍戲的日本導演大為驚呀,後來日本人又喜歡《不夜城》,於是日本行內一傳十,十傳百,李志毅便在日本有些明聲,拍起日本片來。
BS2 2009-07-05 11:09
題材的確見到導演的野心, 不過略嫌胡鬧和不夠深入.
醒波 2009-07-06 20:40
我諗導演想借胡鬧情節取笑迷信者,不過同意你所講,唔夠深入主題,應深入描寫點解咁多人迷信達達大師,片中以新聞報導形式不夠好。
V for Vincent 2009-07-05 06:08
Oh,你喜歡此片??? 我卻頂唔順呢,不喜歡故事本身,且感覺"激"得來很過了火。反而李志毅+梁朝偉之前那齣《流氓醫生》卻好看多,雖劇情的確有點散亂,但拍得很有feel,且眾演員都演得好(那時梁朝偉真的很型,尤其個眼神,即使到現在仍是)。
但總覺得李志毅那時跟陳可辛合導的作品較好,如《風塵三俠》及《新難兄難弟》,但他獨自執導的作品很多都麻麻,像《天涯海角》、《魔幻廚房》等都唔得,《不夜城》據聞不俗但沒看過。
醒波2009-07-06 20:29
鍾意本片條大橋,很難找到港產片將東西兩方的迷信混為一談,不過拍得有啲散亂,有不少多餘情節令劇情不能連貫起,如梁朝偉同陳小春在大球場踢波一段應該剪走。此情況亦在《流氓醫生》出現。另你說「激得過了火」是指什麼?不知是否太刻意營造中產電影?
先後介紹本片和《天涯海角》,我都發覺李志毅對拍片題材有些心得,懂得選觀眾有興趣的題材,不過拍出來永遠太多訊息,作品成日有多餘段落,有啲似徐克失控的作品,唔捨得剪片真係導演大忌。他是否做監製好些?或如係所言與人合導!

沒有留言:

發佈留言