2010年4月4日星期日

王晶與《咖啡女郎》談喜劇

某夜失眠開電視睇,一睇,係久違了的粵語長片,正想閂電視之際,電視突然傳來梁醒波聲音:「你哋都戇嘅!」原來有波叔做唯有乖乖坐下欣賞。這套叫《咖啡女郎》,一九六三年作品,由梁醒波(飾蔡遠河)、李香琴(飾馮人笑)、胡楓(飾趙德樂)、羅艷卿〈飾馮素嫻)、何驚凡(飾凌錫漢)、林丹(飾馮素梅)主演。

故事講孤寒老闆梁醒波因小事與鄰舖老姑婆李香琴發生爭執,胡楓(飾梁醒波員工)正想出手幫助,但睇中羅艷卿(飾李香琴姪女),而掉轉槍頭令梁醒波失威。之後醒目仔胡楓力隱瞞梁醒波到鄰舖追羅艷卿而鬧出不少笑話,最後梁配李、胡配羅、何配林成雙成對大團圓結局。係youtube找到片尾大團圓歌舞,有啲驚嚇,但想大家看看醒目仔胡楓和老姑婆李香琴形象。



註:發哥和馮淬帆合唱「誰可相依」電影《龍的心》主題曲,笑死街坊。

此片可以話係粵語長片版《精裝追女仔》,同樣有扎實喜劇元素。大橋用鬥氣冤家,細節如玩性格衝突(孤寒老闆配老姑婆)、諧音名(蔡遠河)、配搞笑音效(嘩嘩)等等。另推介《珠光寶戲 (Priceless)》,我稱此片為法國版《精裝追女仔》,將鬥氣冤家、兩個社會階層互撞喜劇元素玩到出神入化。我不是想說這兩片抄「咖啡女郎」,不過想大家睇睇六十年代《咖啡女郎》、八十年代《精裝追女仔》、現在《珠光寶戲 (Priceless)》都係非常老套的追女仔式喜劇。但每個年代加入當代喜劇元素拍出好戲。

註:《珠光寶戲 (Priceless)》電影海報,柯德莉塔圖做女主角已經係「方向正確」,追女仔片主角始終係要用靚女。

這些追女仔式喜劇的成功,都建立一條有喜劇衝突的大橋,建立人物性格,再加入笑料。現今喜劇只有承繼某些喜劇元素的細節,但非常忽視建立一條喜劇大橋。所有戲劇都有大橋,喜劇也不例外。大橋有如屋的棟樑,就算你室內裝潢如何豪華,人家一踢棟樑一散就變廢墟。不過最大鑊係往往用舊木 (演員) 去做喜劇,就算有好劇本都死啦。大橋、細節與演員皆胡鬧,所以大家感覺似睇胡鬧片而非「喜劇」。

新藝城、德寶、王晶、洪金寶等以前製作喜劇都承繼粵語長片的優良傳統,莫非現在編導不看粵語長片或舊片?學院編戲課堂冇教?前輩冇教?不過現在都很少喜劇編導,大家都走去拍大陸片或藝術片,彭浩翔都拍《伊莎貝拉》,唉!西方喜劇很多時都很看得不夠痛快,喜劇文化始終有地區性限制。作為喜劇迷現在真係無戲好睇,不斷重溫舊片,重要去睇粵語長片,真慘!時常懷疑現在香港人喜歡無限批評,因為冇好喜劇發洩不滿而成。

現今電影製作人常常話香港市場細,要北望神州,接近放棄港產片。但經過神州電影檢查後,套戲變成內地的「主旋律片」,就悶到抽筋。原來內地檢查員除評核題材是否敏感,還有品味評核。大佬呀!品味都有得評?即係冇定向啦!寫咁多,都係想香港電影製作人投資港產喜劇,滿足吓我哋班喜劇迷。

沒有留言:

發佈留言