2010年4月3日星期六

【四眼仔】于仁泰導演

導演:于仁泰
編劇:黃百鳴
演員:譚詠麟(飾李錦倫)、董驃(飾戴驃探長)、鄧碧雲(飾倫母)、彭健新(飾彭探長)

淨看戲名《四眼仔》,難知屬何片種。如記得《功夫》中四眼仔如何被人鄙視,便知此稱呼不是好東西,無錯,片中主角四眼仔係殺人犯。故仔講四眼仔譚詠麟智商極高,因一次不忿「道友」打老母,想教訓他,卻意外錯手殺人。探長彭健新和其師父董驃經一輪惡鬥,終將譚詠麟繩之於法。

影片開頭不斷描寫譚詠麟是何等天才,如用心理戰術玩殘心理醫生、心算快過電腦、佈局令彭健新差點殺死老婆等等。彭健新無計可施,找師父董驃出山,不過仍不敵譚詠麟,相方智力差距甚遠。這關鍵時刻,差的鬥智片往往在無鋪排下,突然將董驃變成天才或譚詠麟無故犯下小失誤被捕。雙雄智力一百八十度轉變,令人莫名其妙,大鬧編劇「吹水唔抺嘴」,本片在此處卻編寫恰當。

譚詠麟為何成自負天才,因兒時常常目睹爛賭吸毒的父親打媽媽,所以自小好強,希望早日有能力照顧媽媽。董驃發現譚詠麟弱點在其母及孝順性格,於是使鬼計,極力追求其母鄧碧雲,令他失去理智,招認殺人罪。初時譚詠麟仍舊憑智力佔得上風,不久董驃鍥而不捨追求,打動鄧碧雲芳心。當其母當正董驃是白馬王子,更對譚詠麟說「驃驃」向她求婚。譚詠麟即時火起,思緒開始混亂,心力交瘁下度出借刀殺人計,要董驃母親殺兒子,不料董驃用同一計使譚說出真相,成功破案。戲中絕頂天才仍是智商最高,不過敗在自己性格,一時未能控制情緒才使董驃有機可成,鬥智片好睇在於兩方實力接近,對決過程中勝敗要合乎情理,此片做到。

唯一敗筆,法庭判譚詠麟誤殺入獄三年後,董驃見其為孝順仔一名,安排譚在母面前做一場戲,假說要出國讀書。大佬呀!太戲劇化,董驃係警務處長都無權放殺人犯做戲,毫無法律常識。還有一樣要留意,始終係黃百鳴編劇,片中會有大量黃氏笑話,不要期望是套賣形格的鬥智片。


註:預告片


舊回應:
OdaBu HuDSoN 2009-04-10 20:07
以前看過但今日印象仍有少許模糊, 最記得係睇完唔識入於那類戲種 --- 係鬥智?! 搞笑?! 定懸疑........校長個角色, 更像有點精神病.
絕對同意↓的對答, 今日回看, 當時的校長是最紅時期, 在商言商是非用不可.
醒波2009-04-14 23:18
本片唯一好處在鬥智情節有鋪排,有橋,不過正如你同麥兄所言,影片風格模糊。
麥don鴻 2009-04-06 23:38
其實套戲反駁極多,譚伯亦做唔到高智犯既感覺,我只覺得譚伯既演繹似精神分裂,多過似有高智慧...............套戲整體感覺一般,不過于仁泰描述人性陰暗面變化既功力不變,全片都FEEL到譚伯陰沉一面,不過只係氣氛營造有功,同譚伯既鄭嘉穎式演技全無關連。
醒波 2009-04-07 00:50
其實套戲看得出于仁泰幾受劇本限制,好似譚伯殺人個幾段拍得好緊張,鏡頭剪得節奏好快,但其他情節就是黃百鳴式喜劇,出來效果可說不統一,不過當年笑片當旺,無計。所以當一套有形有格的鬥智片會令你失望。
這種戲對譚伯太大挑戰,本片選角是有問題,不過譚伯當年實在太紅,新藝城一定用佢。
歷史狂徒 2009-04-05 16:33
真係張文光教學生款
同埋睇番當年海洋公園機動遊戲,今日感覺已out了
醒波 2009-04-06 23:24
海洋公園與當年相比,變化不少。
BS2 2009-04-02 08:39
當年算是一個新的嘗試, 可惜成績只屬一般.
醒波 2009-04-02 20:01
同意!

2 則留言:

  1. 當年倫伯拍呢套戲 俾FANS大罵佢簡錯角色黎做 毀佢形象WO

    回覆刪除
    回覆
    1. to:nic
      唔俾偶像接拍壞人角色,都而家都無變。通常偶像去試新嘢,已經唔係好紅個時。

      刪除