2010年4月4日星期日

成記茶樓之大哥成獨家專訪

成記茶樓的原著《人在江湖》細緻描寫大哥成,不少情節反映七十年代之香港社會,當中集惹笑奇情於一身,極有趣味。有感而發,本人用模擬訪問,帶出大哥成之前世今生,使大家更瞭解其性情。訪問除去客套說話,大哥成之回答便跟據原著而成。做得不好,請見諒!



波叔:首先,多謝人稱大哥成的王成先生接受「波叔與你」訪問。

大哥成:客氣!客氣!我好鐘意睇《歡樂今宵》!不過我姓梁,桂治洪導演搞錯。

波叔:唔好意思!不過呢!證明小弟有睇《成記茶樓》!但套戲一開始就係茶樓開張,可唔可以講講,點解會開成記茶樓?

大哥成:唉!諗起都好笑!有次,班兄弟死都要同我賀壽,於是就到茶樓擺廿圍酒。點知當晚去到茶樓竟然唔上菜,幾無面呀!一問之下,原來茶樓老闆肥佬鄭唔肯加廚房人工,班友就罷煮!我火都嚟!班兄弟咪攞刀逼班廚立即上菜,全程企係廚房睇住佢哋煮,驚佢哋出蠱惑。後來肥佬鄭話做唔嚟,問我有冇興趣入股,咁咪做咗茶樓老闆,開多瓣門路。我轉頭就同班廚房佬講數,跟市價加佢哋人工,終於搞掂,生意重愈做愈好。真係時來運到,哈哈!

波叔:原來如此!真係錯有錯着。不過你又夠威,有咁多親兄弟同你賀壽!

大哥成:咩親兄弟呀!波叔,我撈偏門o架!

波叔:吓!電影裏面…?失敬!失敬!

大哥成:桂治洪佢自己改編,我無逼佢隱瞞身世。嗱!我由頭到尾講一次你聽。當年我越過悟桐山、閻王坳,下過麻雀嶺,偷渡嚟到呢處。見餓就偷人家啲花生食,俾村民發覺,被人打到半死,後來望田鄉劉四叔救我一命,即係戲裏面位四叔,真係我救命恩人。之後我搵到份工做送貨,本來好地地,自己衰格,用貨款去大檔賭錢,點知輸曬。一時火起就掃場鬧事,被警察拉咗,因斬人判入獄三個月。出冊後,莫名其妙,有班人係咁多謝我。一問之下,原來我掃個賭檔係班人的對頭人,重話我得罪呢班黑幫都無運行,不如加入佢哋個幫會,咁我就撈偏門。

波叔:你嘅往事幾曲折。

大哥成:未算,講多單嘢俾你知,我搞成記茶樓重有一件往事。我有個愛將叫先生鏡,有次走粉斷正入獄。不久,有獄卒嚟收保護費,唔俾的話,先生鏡性命不保。人在佢手,唯有乖乖付款。呀!後來又有另一個獄卒嚟收保護費,發達祖發火將佢趕走。後來點樣?你都估到。跟住我同班手下搞掂涉案幾個獄卒,以慰先生鏡在天之靈。呢單嘢對我打擊好大,另外眼見成記茶樓愈來愈旺,咪帶班手下全力搞成記,從此退出江湖。

波叔:咁你重入正途,個天有眼,送個江大嫂俾你,哈哈!

大哥成:波叔,咪笑我啦!不過可能我做得壞事多,爭啲結唔成婚。

波叔:點解呀!咩事幹?

大哥成:結婚前,我諗住自己始終係黑底,日後有咩不測,戶口可能被凍結。於是就帶未婚妻去開戶口,我有廿萬,俾十萬佢,一人一半。點知去到銀行,話我戶口無錢,係未婚妻面前無曬面,火都嚟,我咪大吵大弄。之後驚動經理,佢整理一輪,跟住到大堂同我講係同事搞錯,戶口確實有廿萬。我問點解,經理支吾以對。我就話一定要解釋清楚,唔想令未婚妻懷疑我的誠信。經理明理,請我哋入房詳談。原來銀行有位職員虧空公款,炒燶股票,經理查明後便原銀奉還,重送上禮券,希望保守秘密,以免損害銀行名聲。禮券就無要,指在還我清白。

波叔:係呀!七三年,好多人瘋狂炒股票,你有無玩幾手呀?

大哥成:個時邊有時間!成記生意好,後來又開間新成記…

波叔:咩事幹沉思?

大哥成:本來我眼見新界區人口愈來愈多,成新興市場,係堵開茶樓應該有得做,跟住就四處搵舖。後來商人張順天係新界有舖,邀請我合資開茶樓,一拍即合,叫天成茶樓。不過最後都開唔成,唉!

波叔:講嚟聽吓點解?

大哥成:衰自己!開天成之前,有個舊手下白頭金揸小巴得罪黑幫,我出手擺平,事後重將收入線費班黑幫名單交俾警方,得罪了生番明同朱大慶。天成剛剛裝修完,兩人就搵人大肆破壞。因為我做翻正行,於是報警,兩人束手就擒。

波叔:咁咪好囉,咩都解決曬,何解開唔成?

大哥成:估到估唔到,法庭放翻佢哋出嚟!之前我出皇氣,所有黑幫都支持生番明同朱大慶打我。睇嚟都做唔到生意,準備拼死一戰。於是賣成記茶樓套現,點知業主何雲生有意唔續租,想收回物業,起新大廈搵大錢,同埋睇準我等錢使,用賤價收購。

波叔:咁有冇賣?

大哥成:波叔你真心急。

波叔:哈哈!

大哥成:係賣咗,而且何雲生還教我玩股票,咁我就用啲錢遣散班伙記,有淨咪俾何生去投資,等我班成記幫專心應付生番明同朱大慶。

波叔:最後你同兩個惡人點樣?

大哥成:兩敗俱傷!重惹到一身官司,又等錢使,於是去找何雲生攞翻啲錢。

波叔:唔…何生炒燶咗股票呀?

大哥成:不只無燶,還賺到一個開。何雲生不斷叫我等多一個月,可賺到一百萬。但係我等住啲錢找筆律師數,打完場交,錢又無,茶樓又無。宜家我重有去成記飲茶,不其然諗起茶樓往事,無限唏噓!

波叔:唔好諗咁多大哥成,人在江湖身不由己。多謝你接受訪問!

大哥成:多謝波叔,再見!



舊回應:
William仔 2009-12-23 12:41
太正啦! 波叔,咁當年麗的個部<人在江湖>關唔關大哥成事?
醒波2009-12-23 20:32
無記錯,《人在江湖》的電影及電視版權都給邵氏買晒,不過麗的個部《人在江湖》,陳觀泰的角色前半生極似大哥成,而後半生又不同,似一半,你話關唔關事,哈哈!

沒有留言:

發佈留言