2010年4月4日星期日

波叔報夢之馮小剛

話說金融海嘯震動天庭,玉皇大帝下令周公多向平民報夢,藉對談解開其心結,作心理輔導。因心懷鬱悶人數成千上萬,於是周公召集眾人幫手,波叔梁醒波被委任成香港「代理周公」……

注意:以下內容多屬虛構,深色字才是引用報紙,不喜勿看。(註:馮小剛下稱小剛)



小剛:點解我係堵?

波叔:你嚟到香港,發夢搵周公,而我係香港代理周公,所以我地咪見面。知你都係拍戲,個夢專登搵間戲院,同你慢慢傾。

小剛:啊!原來你係被欽點的特區周公,多謝前輩提點。咦!螢幕中咪我套《非誠勿擾》!波叔,內地收三億幾,不過無用呀,唉!

波叔:咁都無用,點解?

小剛:我啲戲一來無國際市場,二係連香港叫好不叫座。有樣嘢諗極都唔明,我係香港一直被認為拍文藝片,實際內地電影中,我是最成功的商業片導演。

(波叔心諗:啲香港後輩成日同我投訴,內地咁多西片又唔俾上,港產合拍片重正經過我當年拍啲戲,有阿爺保護住,內地片收三億幾,唔奇呀!當出到花花世界,同咁多獅子老虎搏鬥,唔係咁易搵食。呢隻溫室長大的小朋友,要諗吓計仔開導佢,等佢知道真實世界一面先得。)

波叔:有戲拍咪好,正所謂關公都有對頭人,好難贏得全世界,細姪放鬆啲!

小剛:唉!魏德聖套《海角七號》係內地只係賣了一億多,香港觀眾都識他。因為在他們心中,台灣電影要比大陸電影厲害。

波叔:吓!早十幾廿年前死鬼吳楚帆上來又話而家香港人唔睇台片,真係十年河東,十年河西。不過你唔好為虛名打轉,愈諗愈煩。

小剛:唔係咁講,我係大陸拍成十年戲,影片愈來愈收得,係香港反而無魏德聖過去一年的名氣大。唉!

(波叔心諗:拍戲呢家嘢,唔係話在某啲地區收得,就全世界都要識你,文化唔同,好難比較。而且《海角七號》係香港宣傳咗好耐,魏德聖搞過試影會,名氣大都正常。條友仔思緒好混亂,真係黑,第一次就遇到啲煩嘢,點開解佢呢?)

波叔:咁又唔係咁講,如果唔係農歷新年去油麻地果欄買蟠桃比王母娘娘,都唔知你套戲上咗,係咪宣傳不足呀?細姪,知唔知電影要做足宣傳,淨係拍好電影唔足夠?

小剛:唔係話林老闆(指林建岳)唔幫我宣傳。根本係香港觀眾不關心我哋,佢哋覺得內地片太土,佢哋只知對大陸片說屌,佢哋憑咩嫌我土?美國人對我哋啲態度又係一樣,為咩去追那個市場呢?

(波叔心諗:明明宣傳不足,上映戲院少,浪費套戲,罪在老闆。嘩!真厲害!佢反應夠快,觸角敏銳,護主心切之心人皆可見,真識撈!其實內地片係香港人心中形象老土有其因,好似《夜宴》改編王子復仇記已經夠舊,慶幸故仔講復仇,咩時代的人睇都有共鳴,不過節奏可唔可以快啲。《滿城盡帶黃金甲》改編雷雨就離譜,差唔多照抄,而家咩年代,咩人會用呢個角度睇家庭倫理?其他《十面埋伏》、《無極》,就唔好講,差不多部部故仔都寫唔出現今人性,拍《英雄》重搞到九寨溝烏煙瘴氣,真係唔屌唔得!長輩教落,當周圍啲人都唔鐘意你,係唔係先要檢討自己,一係就繼續我行我素,為咩要人關心。如果唔係周公有令要開解世人,同埋佢而家起哂火,真係想鬧醒佢。)

小剛:咩事唔出聲?

波叔:無,思考緊你啲說話。其實都唔差,至少都有個香港人林老闆欣賞你,好多人發夢都想唔到,真係恨死隔離!

小剛:哈哈!我講嘢係咁直,如果傷害咗香港觀眾,對不起,我沒辦法,我講真話,我對香港觀眾有意見。

波叔:無傷肝,最鐘意人人意見不同,你唔講出心聲,我就唔開心,哈哈!唔好意思,人有三急。


波叔轉身而出去,睇住呢位溫室長大的小剛,最適合安排他在夢中在化身為中學生年年考第一,鏡頭一轉,入到大學就年年考第尾,令他夢醒。亦希望他能領悟當中意思,都係遲啲先將殘酷世界一一細說。



新聞原文
http://appledaily.atnext.com/template/apple/art_main.cfm?ss_id=20090327&sec_id=462&subsec_id=463&art_id=12550978


舊回應:
Danny 2009-03-31 00:21
波叔話:你坐擁十幾億人口嘅市場,卻去介意一個七百萬人嘅市場,乜你咁冇大志㗎...?印度電影都攞咗奧斯卡最佳電影啦... 退而求其次,最佳外語電影都喺幾個人行來行去,唔駛飛來飛去㗎... 咁你唔肯反省,我除咗「屌」,仲有乜好講呢... 醒波2009-03-31 19:53
可能馮小剛心目中重有香港人,真榮幸!
BS2 2009-03-30 19:16
寫得抵死之餘又情理兼備, 佩服佩服.希望馮導演睇完你篇文章會開心番d啦!
醒波2009-03-31 19:42
多謝!多謝!馮導演拍咁多喜劇都應該俾吓面,笑吓掛,哈哈!
OdaBu HuDSoN 2009-03-30 11:20
haha 又係wor, 陳凱歌果陣比而家既馮小剛罵得仲激. 莫非這是大陸導演的文化?! 總覺得文化與市場不同,而港人對內地電影,多少已經先入為主而變得有偏見 --- 一定係老套,節奏慢.......這點好難去改變普遍香港觀眾,多年來對它的看法.
醒波2009-03-31 19:50
講真,日本片同南韓片都有不少佳作,但有幾多部大收?文化不同真係無得講,除非學當年香港拍動作片,才易於征服所有市場。重有睇電影只係一種娛樂,唔需要關心,只有鍾唔鐘意。
歷史狂徒 2009-03-29 15:51
其實,梁醒波與馮小剛的戲路,根本是有所不同。波叔就比較啱我看一些
醒波2009-03-29 20:08
唔同時代好難比,其實馮小剛在內地來說比較好,不過以商業電影來講,不算太突出。
OdaBu HuDSoN 2009-03-29 12:40
閱過馮小剛這段, 感覺他是一位山寨王, 無論在大陸如何成功, 始終外面的世界要的是甚麼, 他亦未有心去了解和領悟.
醒波2009-03-29 20:05
馮小剛可能當內地票房係一個觀賞指標,如同美國票房榜,哈哈!其實香港電影人也應要求中央,令大陸人多啲關心港產片。呢單嘢使我諗起「無極」上映時成績不好,陳凱歌又話啲人唔識欣賞及唔尊重佢,呢啲咩文化來架?
阿能 2009-03-28 23:43
馮小剛的嘮蘇!在報章上看過,馮導演要撫心自問,題材是否太陳舊,如上述所提影片有那一齣不是抄襲舊的電影故事,沒有新內容光靠影像彩色又怎能吸引港人。『非誠勿擾』剛看名字使人摸不着頭腦,故事內容又有點似胡金銓的舊作。貧乏的內容又如何能吸引人呢?
醒波2009-03-29 19:42
未睇『非誠勿擾』,故仔是優是劣不便評論。不過套片係香港啲宣傳真係唔得,上映戲院又少,佢真係無得冤,表面睇好似係佢老闆對此片冇信心在香港大收。雖然我對馮導演和葛優都幾欣賞,不過不少香港戲迷見到舒淇真係卻步,怕她又扮Q,我就被「玻璃之城」嚇到至今,心情仍未平復。

沒有留言:

發佈留言