2010年4月4日星期日

【煎釀叁寶】馬偉豪作品

導演:馬偉豪
編劇:鄒凱光、陳詠燊、龍文康、馬偉豪、李春暉
演員:許冠文(飾龍飛雁)、楊千嬅(飾Sophia)、劉青雲(飾Frankie Yam)、金燕玲(飾 Barbra)、許紹雄(飾丙良)、羅莽

本故事可說馬偉豪為許冠文度身訂做。許冠文飾演大作家龍飛雁,正遇人生兩大難題,十多年來寫不出新作,自感江郎才盡;女兒成年已久,仍覺她未能自立,當她如小孩般保護,怕別人欺負她,實情不捨得女兒離開自己。近年來許冠文也遇這兩大難題,感受良多,使其演出入木三分。本片是輕鬆小品,許冠文演出不誇張,恰似慈父,戲中大作家身份洗脫以往孤寒老闆形象,令人耳目一新,不愧為香港金像獎首屆最佳男主角。

不過,劇中女兒一角太平淡,平庸,甚至無性格,令許冠文與楊千嬅的父女情擦不出火花。其實女兒性格是否有些缺憾,才令許冠文作出過度保護。女兒一角不是楊千嬅常演的傻大姐,角色設計令她演出非常抑制,毫無神采。反之,本片綠葉仍用《新紮師妹》式喜劇,傻人傻語,仍覺好笑。多部電影可看出楊千嬅演戲板斧有限,不客氣說一句,她只懂傻笑,亦只能演《新紮師妹》的傻大姐。

本片令人驚喜之處卻是劉青雲與許冠文這組合。劉青雲飾演萬人迷的花花公子,角色先天令他在戲中非常出位,遇上冷面嚴父許冠文,兩人由對立,到許冠文拜劉青雲為師,甚至後來惺惺相惜,合拍好看。其中許冠文怕劉青雲留宿使女兒不利,便騙他身中劇毒,隨時會「爆陽」,兩人一唱一和令人發笑。兩人首次合作於《鬼馬狂想曲》結尾,劉青雲在許冠文面前模仿他,已覺不俗,此片更上一層樓,希望兩人再合作,創造新經典。



舊回應:
麥don鴻 2009-01-24 00:03
呢套"煎釀叁寶",角色人物設計上其實都唔錯,部份對白都算精機,不過悶場亦唔少,有部份劇情其實都幾胡鬧下。同埋三人可能各有風格,未能一時間融合得到,加上戲本寫得唔夠深入唔夠盡,變左3人關係好似淡淡然咁,變成各有各做,劉青雲同楊千嬅做情侶擦唔出火花,楊千嬅同許冠文做父女亦唔見溫情,雖然兩人都盡量入戲,但感覺好疏離同點到即止..............就係以上總總,令人覺得套戲堆齊之餘,演員演技亦未算令人滿意,3人配搭雖然新鮮同夠晒綽,不過套戲對我黎講一生人,睇一次真係盡晒,唔使再睇。
馬偉豪初期執導既戲,憑手法清新幽默上位,我比較LIKE佢套"山水有相逢"(劉青雲、袁詠儀),故事唔複雜,不過支節豐富,演員演出亦能擦出適當火花,欣賞馬偉豪只此一部,其他都真係睇過就算。
PS:以上全部都係小弟個人意見咋!!! 醒波兄千祈唔好介意
醒波2009-01-24 15:25
戲本真係冇寫好當中父女關係,真係唔知點解許冠文要保護楊千嬅。情侶線更加不成立,楊千嬅失驚無神鐘意劉青雲,之前完全冇鏡頭交代有任何暗戀情節。編劇好似設立兩父女關係及花花公子入侵兩父女的世界便收筆。
你說三人可能各有風格,擦唔出火花,非常認同,其中最差係楊千嬅同許冠文一組,兩人身為兩代笑星,片中好似設立保護網,各有各做,個情況好似「情聖」,將幾代笑星加理會一啲都唔好笑。笑片同踢波一樣,唔係話擺五個前鋒就可入多啲波,要講配搭。不過可能我太喜歡劉青雲與許冠文,仍覺可以一看。另外,我最喜歡馬偉豪的作品是「常在我心」,與其以往作品不同,幾感人,其他則是可以一看而已。
ps:麥兄不要費時寫客氣說話,我就係鐘意各人有不同見解,不喜唯我獨尊,咁先學到嘢,點會介意,開心到黎唔切。
BS2 2009-01-22 23:57
呢套真係笑唔出, 臨尾古裝嗰Part真係差d要割櫈 (好彩無, 因為喺屋企睇嘅).
醒波2009-01-24 14:42
認同結局是爛尾,其實我都唔知本片想走溫情片或是喜劇,可能想兩者兼得,可惜變成兩頭唔到岸。本片我只喜歡劉青雲與許冠文,可能我是兩人的影迷,仍覺可以一看。

沒有留言:

發佈留言