2010年4月3日星期六

【志在出位】葉成康導演


導演:葉成康
編劇:劉鎮偉、何東
演員:鍾鎮濤、張曼玉、林建明、成奎安、許紹雄

現在大家都識laughing哥,九十年代都有名燥一時的瀟灑哥。《新精武門一九九一》中鍾鎮濤飾演瀟灑哥一角,出位惹笑,引來電影人為他拍了《志在出位》,一部瀟灑哥外傳的笑片。成套戲簡單一句,瀟灑是位一事無成的古惑佬,行為思想怪誕,妄想在江湖一夜成名,因一次誤會以為自己身患絕症,變成一個天不怕地不怕的猛人,在黑白兩道成功出位。戲中橋段好似東拉西扯,不過看後會更瞭解瀟灑哥為人,一位極度無聊無知的小人物,本片為喜歡瀟灑哥的人而拍。細看下,劉鎮偉將《旺角卡門》的烏蠅寫成搞笑版,創作出瀟灑哥。

喜歡看笑片的,也應看看。戲中差不多集齊所有形式的通俗笑話,如屎尿屁、性行為、女人性徵、男人性徵、性變態、同性戀、政治、易服癖,應有盡有。首場戲,瀟灑哥與朋友圍住一篤點着炮仗的屎,看看誰人身上中屎,即突顯瀟灑哥的無聊性格,亦直截了當表明本片通俗風格,童叟無欺,不喜勿看。戲中有兩場好笑到飛起,瀟灑哥為達成老友心願,安排假葉子媚做訪問,她更即場表演胸部脫香蕉皮,真係生果,不要心邪;賊人挾持人質,身上只穿底褲的瀟灑哥單刀赴會,當眾人笑他小脹氣併發症(對此病有認識,才明白好笑之處),他果斷地在下陰開鎗,制服賊人。

瀟灑哥一角比起《新精武門一九九一》更出位,更通俗,更低能,而鍾鎮濤在九十年代初仍是靚仔一名,片中角色應該由吳孟達演繹,但他拋開形象包袱,還演出爛笪笪及幽默感,正!反而張曼玉在戲中則只做花瓶,甚至屬客串性質,導致未有表現機會。





註:預告片





註:許紹雄同大姐明大玩SM





註:鍾鎮濤大袋男兒

舊回應:
香港電影王2009-05-12 23:37
波叔,原來大家都係同道中人!! "志在出位"係我一得閒就拿來翻睇既戇居無聊喜劇,瀟灑哥的確係勁! 另外, B哥哥當年的"十兄弟"同"廣東五虎"都係我既至愛,不過要黃飛鴻笑傳係阿倫做既,唔係B哥,但反而我好鐘意黃飛鴻笑傳同黃飛鴻對黃飛鴻....
醒波2009-05-13 21:09
原來大家都喜歡呢啲無聊喜劇,真係有品味,睇你可一口氣數出《十兄弟》、《廣東五虎》、《黃飛鴻笑傳》、《黃飛鴻對黃飛鴻》,我亦信你係呢方面專家,賜教賜教。當中本人都十分鐘意《十兄弟》,將舊版拍成笑片,很正,很低能。
另多謝更正,我所講鍾鎮濤拍黃飛鴻笑片,正是《廣東五虎之鐵拳無敵孫中山》,呢套啲配角好笑,如梁家仁同秋生,不過溫拿五虎表演就麻麻。
麥don鴻 2009-05-11 21:36
有好多人都覺得當年"新精武門1991",瀟洒哥個角色比周星馳既劉晶更好笑,以鍾鎮濤亦真係用一個全新演繹去演,效果亦相當成功。不過導演編劇計錯左條數,以為用瀟洒哥開部戲一定勁收,點知要阿B做配角瀟洒哥就無問題,一擔正要阿B由頭低俗到尾,佢既"演技"就即時見底之餘,佢既表現亦睇得出非常吃力,變成係人都笑唔出,同樣情況,係"特異功能猩求人"就更為明顯................
醒波 2009-05-12 21:08
當年入場睇《新精武門一九九一》,真係俾鍾鎮濤嚇一跳,比起佢八十年代扮傻仔同純情去演笑片係兩回事。可能當時導演無吳孟達拍周星星,就用鍾鎮濤扮達哥,其實瀟灑哥一角同達哥以往角色一樣,不過可能由靚仔做比到驚喜,出來效果又不錯,所以有人覺得比劉晶更好笑。
如果編導諗住《志在出位》會大收,就梗係計錯條數。首先瀟灑哥先天性在大家心中係副角,雖有一定fans,不過唔係大多數,純粹回響大,情況如《古惑仔》的靚坤,會有一定收入,不過不會大收,除非劇本或製作非常認真。如用副角上主角位咁易得,達哥做三叔咪一早發達。另如你所說,本片由頭低俗到尾,這種拍法不是人人可以接受,不過亦有一班固定觀眾喜愛,如西片《搞乜鬼系列》(當然本人非常好此類型片)一樣低俗到底,一樣不能大賣,不過同時長拍長有。
鍾鎮濤演瀟洒哥一角,最好當然在《新精武門一九九一》,在《志在出位》則有啲過火,不過配合到此片低俗風格,我覺得好笑。不過自此之後,鍾鎮濤只用《志在出位》中瀟洒的演繹方法去拍笑片,咁就死火啦。本人對《特異功能猩求人》的鍾鎮濤就無乜印象,不過對鍾鎮濤所拍的黃飛鴻笑片,就感受到非常重複瀟洒哥,真係笑唔出。
BS2 2009-05-11 21:16
"新精武門"還可以, 呢套真係笑唔出.
開頭拍攝黑社會講數那段係抄漫畫書"城市獵人"
醒波2009-05-12 20:15
各花入各眼,可能我太鐘意瀟灑哥一角。
另你講預告片開頭是否小脹氣併發症一段?不過本片差不多所有笑話都是抄襲或改善一些經典笑話,哈哈!
OdaBu HuDSoN 2009-05-09 12:30
瀟洒哥印象模糊, 反而記得他在新精武門的角色...
醒波 2009-05-11 20:49
《志在出位》的瀟灑哥就是《新精武門》中角色,不過更瘋狂,更通俗。
歷史狂徒 2009-05-09 09:53
個排鍾鎮濤有幾套戲勁搞笑,除《志在出位》外,還有《新精武門1991》、《表哥我來也》,套套都笑到爆咀。講起《志在出位》,許紹雄也勁搞笑,佢個位屋邨小男人,表面怕老婆,內裡是一個玩SM的變態佬。
醒波 2009-05-11 20:46
個排鍾鎮濤真係幾搞笑,不過他現在做喜劇仍停留在九十年代。
戲中許紹雄同大姐明做夫妻真係幾搞鬼,有驚喜。

2 則留言:

  1. 我仲以為瀟灑哥係【學校風雲】果度出嚟…

    回覆刪除
  2. to:搖滾小王子
    片中瀟灑哥的人物性格似是戲謔《旺角卡門》的烏蠅,而瀟灑哥這名字可能借用《學校風雲》。

    回覆刪除