2010年4月4日星期日

邵氏再起風雲?

晨早起身睇報紙,一看,娛樂版頭條「無綫藝員晒冷拍七十三家租客」、「停產廿二年」、「邵氏再戰影圈」,心諗有冇睇錯。以為邵氏開拍《Laughing哥前傳》係食熱潮之作,順道慶祝邵氏兄弟(香港)有限公司在港拍片五十週年,博取六叔(邵逸夫)一笑。原來邵氏將於今年開拍三片,與英皇合拍一片、《Laughing哥前傳》及《七十三家租客》,不似「玩票性質」,大有猛虎出山之勢。

以七三年版本《七十二家房客》作故事藍本的《七十三家租客》,觸動本人神經線。當年楚原重拍黃為一的《七十二家房客》,以「歡樂今宵」當紅電視藝人用粵語拍攝,大收五百多萬港元成為年度票房冠軍。此後在港放影的唐片多另配廣東話,而停拍年多的粵語長片亦重新拍攝,之後許氏兄弟也從電視圈投入電影界,形成港產片雛型。邵氏再重拍此片,理論上意義極大,還看當今香港影壇積弱多年,似有所暗示,不只重奪龍頭之位,還要振興港產片。

《七十三家租客》,片名由房客改為租客,李力持執導,曾志偉、吳君如同無線全台小生花旦合演。一聽之下,似將七三年的成功方程式照做一次,未敢樂觀。原因有二,當年電視明星受歡迎程度不可同日而語已;無論房客或租客,現今香港鄰里關係早已走入老子的理想世界,「民至老死,不相往來。」,試問戲迷對手望相助的劇情有何感覺,除非李力持諗到天橋。無論如何,邵氏再戰江湖,總叫人期待,正所謂「邵氏出品,必屬佳片」,唔打得都睇得。當今香港影壇,缺乏新星及幕後人才,其中致命傷係無大電影公司保持穩定的產量。希望邵氏做得到,重振港產片聲威。


註:黃為一版本片段


註:楚原版本片段二


舊回應:
冷月2009-08-17 16:27
睇完Laughing哥前傳...頭果5分鍾已經"笑"左,
1. 元先生冇啦啦叫伙記"抽頭"過果嫁車, 唔係急成咁呀?
2. 2個殺手冇啦啦殺死左對方, 警察帶個犯"謝天華"去洗手間, 居然比其他 人入.....猜犯最少2個差人1個入面1個出面啦...
睇左5分鍾就覺得套片得啖"笑"
醒波2009-08-17 22:40
我無看過該電視劇,又無上網上香給Laughing哥,真係全無意欲觀看一套噱頭電影。之後套《七十三家租客》會有啲興趣,製作好似較認真。
George 2009-04-25 22:12
自己後生,未知當年邵氏如此興旺,又怎麼會發展到停拍廿二年的地步呢?是因為轉型辦電視台嗎?
醒波2009-04-25 23:56
簡單來說,邵氏有自己片廠,為不浪費片廠資源,要不斷拍片,當時太多影片唔收得,咪賠大錢,最後片廠轉型租給電視台拍劇。至於點解當時邵氏影片唔收得,表面睇係差不多所有人才去了嘉禾和新藝城或自行投資。
Lam Lam 2009-04-24 14:49
後期邵氏己無復當年勇,畀嘉禾過晒頭!
醒波2009-04-25 23:44
當時嘉禾搶走外國及亞洲市場,加埋新藝城來勢洶洶,直情87年收檔。
麥don鴻 2009-04-24 01:48
其實邵氏以前D戲成功,除左題材同拍攝質素好之外,肯創新都係邵氏成功因素之一,試問邵氏有邊一類片無嘗試拍過,真係講得出既片種都拍過晒。而家香港影壇數黎數去都係得一兩款片種,老細又唔肯俾D錢拍D新片種,淨係一心諗住泊大陸碼頭,狂拍合拍片,咁邊有前途架!!! 就睇下呢個"新邵氏"可以拍到幾多部戲"獻世",其實之前方逸華掌舵既大都會,D戲既品質都有一定保証。我只希望"新邵氏"可以有大都會一半水準已經好開心,常再重建新邵氏王國!? 呢個諗法直情痴撚線
醒波2009-04-25 23:39
坦白講冇六叔揸旗的邵氏不應叫邵氏,我懷疑「新邵氏」純粹擦鞋之作,不是重建邵氏王國,方逸華及樂易玲識Q拍戲,睇下而家的TVB就知,成班人擦鞋就識,如果係掂,就唔使87年停產,你諗翻當年港產片當旺也如此,而家更不敢想像,當年大都會有星仔及杜琪峰的戲才有好票房。一句到尾,有冇人才肯加入「新邵氏」,你知邵氏而家人工幾高啦!不望邵氏重振聲威,只希望「新邵氏」拍些不同片種,同埋每年開戲就好,我諗佢的發行網可有力選擇不拍合拍片。
狂拍合拍片都不是問題,最大問題係而家香港影壇的老細係大陸賺到啲錢都不會用一毫子拍些不合中國國情的片,究竟內地票房係咪假。同意你所講現時片種太少,不只港產片,華語片也是。
歷史狂徒 2009-04-21 13:54
今日的邵氏王國,已不及當年勇,重振港產片聲威,靠邵氏真係難
醒波2009-04-23 20:55
始終邵氏個底最厚,唯有靠佢,不過都寄望李澤佳搞旺個場。
OdaBu HuDSoN 2009-04-19 11:39
睇電影 Kill Bill vol. 1 片頭就是出邵氏logo, 夠哂玩野, 其實純粹致敬.
醒波2009-04-20 20:57
劉家輝話昆頓塔倫天奴在租帶公司工作時,常看邵氏影片,而且非常喜愛。Kill Bill受歡迎,令我不得不服昆頓塔倫天奴。

2 則留言:

  1. 其實而家港產片要貴精唔貴多,寰亞集中火力拍一年七八部,風險控制好好多。

    邵氏而家拍新片條數看到好緊。一部中成本六七百萬,已經要幾個partner 出,確保唔蝕。其實佢大可以唔拍,但係當成社會責任看,就唯有刀仔鋸大樹。

    無線表面上有份出錢,其實係用廣告推廣費用相柢。咁樣佢唔駛真金白銀攞出嚟。邵逸夫永遠無死錯人。

    唔好樂易玲無腦,佢由八十年代住邵氏盤數十幾年,一定有三兩下板斧。

    回覆刪除
  2. to:yorus
    我覺得而家很少港產片,已經不是風險的問題,而是電影公司集中大量資金在大陸拍片,希望賺多啲錢,因此少了人投資港產片,都無可厚非。
    另外,又唔覺得邵氏為了社會責任而拍港產片(自九十年代中計起,近兩年的港產片未算最差,何解邵氏要現在才復出。),我想邵氏可能見大陸市場興旺,於是小試牛刀。無死錯人的作風似是方逸華,而邵逸夫是慳家但不算死草,看看舊時邵氏大灑金錢於製作之作風便知。
    小弟不敢說方逸華和樂易玲無腦,只是說她們唔Q識拍戲,意思是指她們對電影沒有觸角,只懂管好盤數,甚至數字第一,這樣的行政人員在普通商業機構是無問題的,不過對創意行業就有所不足,甚至是災難。

    回覆刪除